নমস্তে শরণ্যে শিবে সানুকম্পে, নমস্তে জগদব্যাপিকে বিশ্বরূপে। নমস্তে জগদবৃন্দ্য-পদারবিন্দে, নমস্তে জগত্তারিণি ত্রাহি দুর্গে।।১॥
নমস্তে জগচ্চিন্ত্যমানস্বরূপে, নমস্তে মহাযোগিনি জ্ঞানরূপে। নমস্তে সদানন্দনন্দস্বরূপে নমস্তে জগত্তারিণি ত্রাহি দুর্গে।।২॥
অনাথস্য দীনস্য তৃষ্ণাতুরস্য ভয়ার্তস্য ভীতস্য বদ্ধস্য জন্তোঃ। ত্বমেকা গতিৰ্দ্দেবি নিস্তারদাত্রী নমস্তে জগত্তারিণি ত্রাহি দুর্গে।। ৩ ।।
অরণ্যে রণে দারুণে শত্রুমধ্যে অনলে সাগরে প্রান্তরে রাজগৃহে। ত্বমেকা গতিৰ্দ্দেবি নিস্তারহেতুর্নমস্তে জগত্তারিণি ত্রাহি দুর্গে।।৪।।
অপারে মহাদুস্তরে অত্যন্তঘোরে বিপৎসাগরে মজ্জতাং দেহভাজাম্। ত্বমেকা গতিৰ্দ্দেবি নিস্তারনৌকা নমস্তে জগত্তারিণি ত্রাহি দুর্গে।। ৫।।
নমশ্চণ্ডিকে চণ্ডদোর্দণ্ডলীলা- লসৎখণ্ডিতাখণ্ডলাশেষভীতে। ত্বমেকা গতির্বিঘ্নসন্দোহহন্ত্রী নমস্তে জগত্তারিণি ত্রাহি দুর্গে।। ৬৷৷
ত্বমেকাজিতারাধিতা সত্যবাদিন্যমেয়াজিতা ক্রোধনা ক্রোধনিষ্ঠা। ইড়া পিঙ্গলা ত্বং সুষুম্না চ নাড়ী নমস্তে জগত্তারিণি ত্রাহি দুর্গে।। ৭।।
নমো দেবি দুর্গে শিবে ভীমনাদে সরস্বত্যরুদ্ধত্যমোঘস্বরূপে। বিভূতিঃ শচী কালরাত্রি সতী ত্বং নমস্তে জগত্তারিণি ত্রাহি দুর্গে।। ৮।।
শরণমসি সুরাণাং সিদ্ধবিদ্যাধরাণাং মুনিদনুজনরাণাং ব্যাধিভিঃ পীড়িতানাম্। নৃপতিগৃহগতানাং দস্যুভিস্ত্রাসিতানাং ত্বমসি শরণমেকা দেবি দুর্গে প্রসীদ ॥ ৯।।
ইদং স্তোত্রং ময়া প্রোক্তমাপদুদ্ধারহেতুকম্। ত্রিসন্ধ্যামেকসন্ধ্যং বা পঠনাদেব সঙ্কটাৎ ॥ ১০।।
মুচ্যতে নাত্র সন্দেহো ভুবি স্বর্গে রসাতলে। সমস্তশ্লোকমেকং বা যঃ পঠেৎ ভক্তিতঃ সদা ৷৷ ১১ ৷৷
স সর্ব্বদুষ্কৃতিং তীর্জা প্রাপ্নোতি পরমাং গতিম্। পঠনাদস্য দেবেশি কিংন সিধ্যতি ভূতলে। স্তবরাজমিমং দেবি সংক্ষেপাৎ কথিতং ত্বয়ি ।৷ ১২৷।
ইতি শ্রীবিশ্বসারে আপদুদ্ধারকল্পে শ্রী দুর্গাস্তবরাজঃ সম্পূর্ণম্।